شنو اهو الـ Volume Profile

شنو اهو

الـ Volume Profile يوريك كم عقد تداول عند كل سعر خلال الجلسة، مرسوم أعمدة أفقية على جنب الشارت. الشارت يقولك وين وصل السعر، والـ Profile يقولك وين تداول السوق.

الحجم العادي تحت الشارت مرتب بالوقت. الـ Volume Profile مرتب بالسعر.

شلون ينقرا

كل عمود سعر. طول العمود عدد العقود اللي تداولت عند هالسعر.

منه تطلع ثلاث أرقام:

  • الـ POC: السعر اللي تداول عنده أكبر عدد عقود.
  • الـ Value Area: المنطقة اللي تداول فيها 70% من عقود الجلسة.
  • الـ VAH والـ VAL: حد الـ Value Area من فوق، وحدها من تحت.

وبعدها سؤال واحد: السعر الحين وين من قيمة الجلسة اللي طافت؟ فوقها، ولا داخلها، ولا تحتها؟

والمكان بروحه ما يكفي. لو السعر طلع برا القيمة، فيه سؤال ثاني: السوق قبل السعر برا وبقى هناك، ولا رفضه ورجع داخل؟ هذا وصف للي صار، مو توقع.

وعندي الـ Profile محسوب على الـ Cash Session لـ ES وNQ، وعلى جلسة COMEX لـ GC.

وشكل الأعمدة نفسه له معنى: صفحة شكل الـ Profile.

مثال

على ES، وبأرقام توضيحية:

الجلسة اللي طافت: الـ VAH عند 6,025.00، والـ POC عند 6,010.00، والـ VAL عند 5,995.00.

يعني أغلب تداول الجلسة كان بين 5,995.00 و6,025.00، وأكثر سعر تداول عنده 6,010.00.

اليوم السعر فتح عند 6,031.00. هذا فوق الـ VAH، يعني برا قيمة أمس من فوق. هذا كل اللي يقوله الـ Profile: وين اهو، مو وين بيروح.

الغلط اللي يطيح فيه المبتدئ

  • يعامل الـ VAH والـ VAL كجدار، وينطر السعر يرجع منهم بدون ما يطالع العقود.
  • يرسم الـ Profile على فترة غير (اليوم كله بدال الـ Cash Session)، فتطلع أرقامه غير.
  • يحسب إن العمود الطويل معناه شراء. العمود يقول كم عقد تداول، وما يقول منو كان المستعجل.
  • يخلط بين الـ POC والـ VWAP. الأول أكثر سعر تداول، والثاني المتوسط.

على سوق ثاني

الـ Volume Profile اللي بشارت الوسيط مبني على tick volume، يعني عدد مرات تغيّر السعر، مو عقود حقيقية. فاقرا الـ Profile من CME أو COMEX، وبعدها انقل الثلاث أرقام لشارتك.

وسعر الوسيط (مثل XAUUSD وEURUSD وUS500) يختلف عن سعر CME وCOMEX. فحدد الفرق (basis) بنفس الدقيقة قبل ما تستخدم أي مستوى أو تحلل أو تدخل أي صفقة، وانقل المستوى كمنطقة مو كخط.

وين تكمل

هالصفحة تعريف. شلون نقرا السعر لما يوصل هالمستويات، هذا اللي نسويه مع بعض بـ الورشة.

المحتوى تعليمي، ومو نصيحة مالية. وكل الأرقام بالأمثلة توضيحية، مو أسعار حقيقية.