شنو اهي الـ Value Area والـ VAH والـ VAL

شنو اهي

الـ Value Area اهي المنطقة اللي تداول فيها 70% من عقود الجلسة. حدها من فوق اسمه VAH، وحدها من تحت اسمه VAL.

يعني اهي الأسعار اللي قضى فيها السوق أغلب تداوله. نسميها «القيمة».

شلون تنقرا

تنحسب من الـ POC: نبدا من أطول عمود، ونوسع فوق وتحت، لين ناخذ 70% من عقود الجلسة.

وبعدها ثلاث أماكن بس:

  • السعر فوق الـ VAH: برا القيمة من فوق.
  • السعر بين الـ VAH والـ VAL: داخل القيمة.
  • السعر تحت الـ VAL: برا القيمة من تحت.

ولو السعر طلع برا، أسأل: السوق قبله برا، ولا رفضه ورجع داخل؟

  • القبول (acceptance): السعر طلع برا القيمة وبقى هناك.
  • الرفض (rejection): السعر طلع برا ورجع داخل.

الاثنين وصف للي صار. ولا واحد منهم يقول شنو بيصير بعدين.

وليش 70%؟ هذا الإعداد اللي أشتغل عليه. بعض المنصات تجي على 68%. لو منصتك على 68% أرقامك بتطلع غير شوي عن أرقامي، فحطها 70% عشان نشوف نفس الشي.

والـ Value Area عندي محسوبة على الـ Cash Session لـ ES وNQ، وعلى جلسة COMEX لـ GC.

مثال

على ES، وبأرقام توضيحية:

الجلسة اللي طافت: الـ VAH عند 6,025.00، والـ POC عند 6,010.00، والـ VAL عند 5,995.00.

الحالة الأولى: السعر اليوم عند 6,031.00. هذا فوق الـ VAH. لو بقى فوقه، السوق قبل السعر برا القيمة.

الحالة الثانية: السعر طلع لـ 6,031.00 ورجع لـ 6,018.00. هذا رجع داخل القيمة. السوق رفض السعر برا.

نفس المستوى، وقراءتين. والفرق بينهم ينشاف بعد ما يصير.

الغلط اللي يطيح فيه المبتدئ

  • يسمي الـ VAH والـ VAL خطوط يوقف عندها السعر. اهم حدود منطقة، وشنو يصير عندهم ينقرا من العقود.
  • منصته على 68% واهو ما يدري، فيحسب نفسه غلطان.
  • يقرا القبول أو الرفض من شمعة وحدة.
  • ينسى إن الـ Value Area حقت الجلسة اللي طافت ثابتة، وحقت اليوم تتغير لين تسكر الجلسة.

على سوق ثاني

الـ VAH والـ POC والـ VAL تنتقل لشارت الوسيط كمناطق، مو خطوط.

سعر الوسيط (مثل XAUUSD وEURUSD وUS500) يختلف عن سعر CME وCOMEX. فحدد الفرق (basis) بنفس الدقيقة قبل ما تستخدم أي مستوى أو تحلل أو تدخل أي صفقة، وانقل المستوى كمنطقة مو كخط.

يعني لو الـ VAH على GC عند سعر، اهو على XAUUSD عند سعر ثاني. والفرق يتغير، فحدثه كل يوم.

وين تكمل

شكل توزيع العقود داخل الـ Value Area له صفحة: شكل الـ Profile. وقراءة العقود عند الـ VAH والـ VAL، هذا اللي نسويه مع بعض بـ الورشة.

المحتوى تعليمي، ومو نصيحة مالية. وكل الأرقام بالأمثلة توضيحية، مو أسعار حقيقية.